لسلام عليكم ورحمة الله وبركاته.
الإخوان ديال الولى باك والتانية باك بصفة خاصة.
والناس كاملين لي عندهم امتحانات بصفة عامة.
اولا مبروك عيدكم والله يعودوا عليكم بالخير واليمن والبركات وكل عام وانتم بخير.
تانيا جمعة مباركة، وبما اننا فهاد النهار العضيم والايام العضيمة، فيارب تسهل على كل واحد منكم وتفرحوا وتوفقوا فالامتحان سواء الناس ديال غدا السبت، أو الايام لي جاي، فأنا كنتمنا الله يوفق كل واحد فيكم لما فيه الخير والفلاح والصلاح انشاء الله.
اذن غدا الامتحان وانا كنبغي ديما نهضر غير فالتخصص ديالي ،فعافكم ا الإخوان متخلعوش رآه هدا كيقى غير امتحان وميكون غير لي دار الله ومول الخير يدير الخير، فبشوية عليكم، العام داز متفقص راسك متعصبك وسلم امرك لله، إلى وجدتي شي حاجة راك غدي تلقاه وعلى حساب الاجتهاد ديالك ربي ميخيبكش.
ندخل للقسم مطمئن بشوية عليا، لكن كيف وصيتكم، سير بكري، ومتبقايش تهضر خضرة خاوية، حاول تبقى مركز، شوف الناس لي معاك فالقسم، هضر معاهم وأهم حاجة تفقوا كل واحد يسول سؤال للأستاذ لي كيدخل يشرح الامتحان، وتوفقوا انكم تسولوا بالترتيب، ومتبقايش تنقزوا فالاسئلة،ولي سول نسمعوا ليه، وملي يكون الاستاذ يجاوب نكتبوا فالوسخ النقط باش منساوش ونستعملوا الأقلام المزهرية الملونة، باش نعقلوا فالنص على بعض الأشياء، من بعد ندخلوا للقسم، نسميو الله، وقراو ماتيسر، وندعيو :اللهم لاسهل الا ماجعلته سهلا، وانت تجعل الحزن إذا شئت سهلا، أو اللهم افتح علينا فتوح العارفين بالحكمة ودكرنا مانسينا، اللهم امين.
نشد بلاصتك والسكات نركز مكنبقاش ندور فوجهي ولا نهضر هضرة خاوية، من بعد اتحط الورقة، نقرأ وكنصحك 15 دقيقة الأولى قرت باش تنشط الباحات ديال عقلك لي مخزنة الفرنسية، بحال إلى كنقولها وجد راسك رآه بغيتك،إلا إلى دخل الاستاذ لي كيشرح بكري، ركز معاه وكتب وتا يخرج، عاد رجع قرأ،
واخا قريت مزيان، هنا دور الماركور والألوان سطر على اي حاجة بانت ليك، بحال إلى كتبدى تجاوب شفويا،ومن بعد إلى بغيتي اول حاجة بدا بيها هي، كتب شي فقرة ولا جوج ديال expression écrite باش الأفكار لي جاوك ميهربوش كتقيدهم بالكتابة وتخليهم تا ترجع فالاخر، هدا كيوفر على التفكير فالاخر ديال الامتحان حيتاش تتكون عيتي، فاللهم تزرب على عقلك ما حدوا باقي فاوج العطاء، ومن بعد نبدأ نجاوب بشوية عليا، وديما 10 دقايق الأخيرة خاصني نخليها باش نراجع كلشي.
منساش نوصوكم تنعسوا بكري، وحتا إلى كنت مولف الشهير، عافاك دخل لبلاصة مضلمة بكري، وميكونش التلفون، وحاول تسترخي حتى يجيك النعاس ولو تبقى بزاف ماشي مشكل لان الضلام الكامل كيوهم الجسم انه ناعس وكيبدى يسترخي، الصباح ا الإخوان خليني من ديك الهضرة ديال مكنفطرش ،حاول تاكل مزيان، أو فطر بالتمر، الزبيب، أو الفواكه، المهم حاول ما أمكن تاكل سكر طبيعي، وقرعة ديال الماء كبيرة، وكل شوية جغيمة، ماشي تشرب بزاف، ولكن جغيمات،ديم الفم ديالك تحس بيه طري، متخلش راسك تشحف،وطبعا إلى معاك تميرات او زبيب، اوتفيفيحة، المهم دير بحال الاعبين ديال التنس،
فالاخير نتا راك انسان والقيمة ديالك كبر من انك تقمعها فامتحان، لي عليك ديروا او وياك والغش، راك كتحطم راسك والقيمة ديال راسك، والامتحان غدي يدوز باش ماعطى الله، والحياة رآه كتستمر، وغدي يجيوك فرص أخرى تثبث فيها انك انسان ناجح، ويمكن فاي مجال.
اذن مبقا لي غير نتمنى ليكم التوفيق، والله يتقبل منا ومنكم صالح الأعمال والله يسهل علينا وعليكم. والسلام عليكم ورحمة الله وبركاته.